قفة احاسيس

كل يوم اكتشف جديد ... اذا انا حي ... ارزق ... و افكر

...

.. عالم البلوجرز مره تانيه ... عباره عن سوبر ماركت للاحاسيس

كله موجود

العاطفي الحسيس .. و العملي البارد

الحامي و التلم

الحكيم العاقل و الاهبل

المتهور و المتأني

الصادق و الكذاب

و كأن الدنيا خلت من هذه النماذج .. فجمعناها كلها في مكان واحد

زى حديقة الحيوانات كده ...علشان ناخد راحتنا في الفرجه

و اللي ما يشتري يتفرج

...

... وكل واحد مزوق احاسيسه علشان يعرف يمشيها

ماهي تجاره برضه

يرص الحلو فوق علي الوش ويخللي البايظ ورا

.. وما فيش نقاوه

و يا ويلك يا سواد ليلك لو حس صاحب المطرح

و لا القفص زي ما تسميه بقي ... انك بتقلب في البضاعه

...

... اللي مش ظريف في الموضوع ان كل واحد فاكر ان منتجه هو اللي مافيش زيه

..منتج ماحصلش .. اشتريه تيجي مبسوط كتير

.. تحل كل مشاكل حياتك

تاكل و تشرب وتحل مشاكل المجتمع ... و تجاهد كمان

بس اشتري و جرب

واذا مش عاجبك اوزن بره زي ما بنقول في مصر ... بس ما تقلبش

واذا اشتريت .. يا حلاوه ... نام قريرالعين ... عملت اللي عليك

. قريت و فهمت وناقشت في حدود المسموح ... وتم المراد

...

انا بأقول الكلام ده و قلبي واجعني من الشيزوفرينيا اللي اصبحنا نحترفها

. و لاحول ولاقوة الا بالله

افتح الصبح الاقي عويل و نحيب علي لبنان وفلسطين

...قانا و غزه

و من مين ... من شباب زي الورد

كله اشتري

اشتري كلام

و خلينا نسيب الفعل للناس التانيه

و الله لو في نفس ما كنت قعدت ثانيه

ده احنا حتي ما حصلناش القواعد من النساء

...

... قفلوا الدكاكين بقي في عرض دين النبي ... كفايه بقي

بقينا زي اهل المغني زي ما قال بيرم .. دماغنا وجعنا

.. و بدل دقيقه سكوت لله .. خللوها دقيقه عمل لله