وشوشهم مراية قلوبهم

جت قعدتي مع قهوتي قدام نافورة جوة مول في يوم تلج شمسة ساقعة
الكل هربان جوة المول في الدفا...زحمة و دوشة ...عيال كتير و اهاليهم بيرموا في النافورة قروش ـ سنتات ـ ا عتقادا بإن دة بيحقق الاماني


الفرجة عالعيال ممتعة ـ لما تبص عليهم ـ تلاقي التعبيرات اللي علي وشوشهم واضحة مقرؤة زى الهدوم اللي لابسينهم الوانها صريحةـ صاحية
فرحة.. ضحكة عريضة.. امل.. عينيهم بتلمع

وشوشهم مراية قلوبهم
اماني التفكير فيها يرسم علي وشك انت بسمة ترجعك 40 سنة ورا

شوكولاتاية كبــــيرة ماتخلصش
لعبة ما تتكسرش.. و لا كبيرة مشوار لديزني يطول حبتين

الكبار... الفرجة عليهم تغم
تلاقية يرمي القرش بسرعة كانة بيسرق امنية
ولا بيرمي القرش و هو ماشي ..مكسوف من اللي بيتمناة خايف حد يشوفة
ولا سرحان بيفكر ـ و يرمية -زى مايكون مسلوب الارادة - ويكمل سرحانة عشمان يفوق علي واقع جديد
عمرك ما تقدر تقرى اللي جوة دماغاتهم.. ولا شايف من اقنعة وشوشهم نوعية امانيهم

الاعتقاد برمي العملة في النافورة و جلب دة للحظ عند كبيرهم وصغيرهم واحد
المية واحدة
النافورة واحدة
الفلوس واحدة
لكن مفهوم اللي بيرمي - للفلوس- مختلف
فاختلفت الاماني شكلا و موضوعا


وضاعت الاصوات فجاة
وتملكني قول الحق
و خشعت الاصوات للرحمن فلا تسمع الا همسا